A situación na que vive toda persoa que escribe pero aínda non acadou unha difusión pública para a súa obra é sempre complexa. Por unha banda, está convencida de que posúe capacidade para escribir ficción narrativa e sente que facelo é unha das súas maiores arelas. Por outra, non pode deixar de pensar que precisaría de alguén, fóra do seu círculo máis próximo de relacións, capaz de analizar e valorar o que escribe, con imparcialidade e desde un punto de vista literario. Entre a paixón persoal e a carencia desa análise externa, desenvólvese o seu labor literario. 

Conscientes dese feito, no LapLit da Fundación Euseino? puxemos en funcionamento este Club de Escritura. Un lugar de encontro para as persoas que escriben narrativa de ficción, onde os orixinais se comparten con outras persoas en situación similar e con idénticos intereses. 

Partindo de experiencias anteriores, o Club de Escritura basea o seu funcionamento na relación que, en grupos reducidos, se establece entre os participantes. En procura dun proceso de escritura baseado na práctica e nunha aprendizaxe dinámica e motivadora dos recursos literarios.

As súas actividades iniciáronse en setembro de 2022 para continuar ata xuño de 2024. O coordinador literario foi o novelista Xosé Monteagudo, quen supervisaba todos os traballos para ofrecer unha análise narrativa rigorosa e fornecer a quen escribiu cada un deles suxestións que lle permitisen aproveitar todo o seu potencial literario.

O Club de Escritura iniciou as súas actividades en setembro de 2022 coa temporada que rematou en xuño de 2023. Cun límite de dez persoas participantes.

A segunda temporada abrangueu de setembro de 2023 a xuño de 2024. Tamén con dez persoas participantes.

Lugar das xuntanzas: sede da Fundación Euseino? na rúa de México 37 de Vigo: ver no mapa.

---