Precursoras da ilustración

A finais de do século XIX era costume, entre os artistas de Filadelfia, visitar os estudios dos pintores. Na cidade, existían clubes de arte para os homes mais as mulleres non tiñan un lugar para intercambiar ideas e expor os seus traballos.

En marzo de 1897, Emily Sartain, daquela directora da Escola de Deseño para Mulleres, organizou a primeira reunión do chamado Club Plastic. O termo plastic, suxerido pola artista Blanche Dillaye, referíase ao estado de calquera obra de arte inacabada. O clube foi creado para promover un coñecemento máis amplo da arte e para facer progresar o interese polas artistas a través de exposicións e relacións sociais.

No seu primeiro ano de existencia, o clube organizou seis exposicións, que representaban distintas facetas da arte. O Club Plastic, ademais das clases de arte e as exposicións, realizou poxas de, entre outros, impresionistas norteamericanos coma Colin Campbell Cooper e Daniel Garber, o pintor realista William James Glackens e o fotógrafo e pintor C. Yarnall Abbott; tamén se deron conferencias, das que destaca a impartida polo artista checo Alphonse Mucha, un dos máximos representantes do Art Nouveau.

Entre as artistas máis sobranceiras que formaron parte deste clube inclúense Elenore Plaisted Abbott, Paula Himmelsbach Balano, coñecida polas súas vidreiras, a retratista Cecilia Beaux, a pintora impresionista Fern Coppedge, as ilustradoras Elizabeth Shippen Green, Charlotte Harding e Frances Tipton Hunter, Violet Oakley, primeira pintora norteamericana en recibir un encargo para realizar un mural público, as irmás Emily e Harriet Sartain, Jessie Willcox Smith e a gravadora Alice Barber Stephens.

This slideshow requires JavaScript.

Ilustracións de Elenore Plaisted Abbott

 

Deste grupo de artistas e ilustradoras, ímonos centrar aquí en Elenore Plaisted Abbott (1875 – 1935), nada en Lincoln (Maine, EUA), que iniciou a súa formación na Escola de Deseño para Mulleres de Filadelfia, dirixida de 1866 a 1920 por Emily Sartain, a primeira muller en gañar unha medalla de ouro na Feira Mundial de Filadelfia (1876). Elenore Plaisted Abbott estaba casada con C. Yarnall Abbott, de quen colleu o apelido.

Membro do Club Plastic, completou a súa formación na Academia para as Artes de Pensilvania e na Academia de Belas Artes de París. Segundo recoñeceu ela mesma, a súa obra viuse influenciada polo ilustrador Howard Pyle, un dos seus mestres no Instituto Drexel de Arte, Ciencia e Industria. Era considerada unha das chamadas “New Woman”, segundo o termo popularizado polo escritor Henry James para referirse ás protagonistas das súas novelas Daisy Miller e The Portrait of a Lady; en contraposición ás mulleres da era victoriana, as denominadas “New Woman” participaban activamente na sociedade e foron o símbolo do modelo de independencia, profesionalización das mulleres e intervención na vida pública. Pintoras e ilustradoras como Elenore Abbott desenvolveron un papel crucial na representación artística das “New Woman” como exemplo deste novo tipo emerxente de mulleres.

A comezos do século XX, máis da metade dos subscritores das revistas eran mulleres. Coñecedores disto, os editores comezaron a contratar ilustradoras que reflectisen o mundo cunha perspectiva nova. Dese xeito, moitas mulleres artistas comezaron a traballar para revistas de renome. Elenore Plaisted Abbott traballou para Harper, Saturday Evening PostScribner’s. Realizou tamén ilustracións para a novela Kidnapped (“Secuestrado”), de Robert Louis Stevenson, para os contos dos irmáns Grimm, o Robinson Crusoe de Daniel Defoe e os Tanglewood Tales de Nathaniel Hawthorne. Tamén deseñou a escenografía da obra The Emperor Jones, do dramaturgo e Premio Nobel Eugene O´Neill.

Jessie Willcox Smith: as cores da mirada

This slideshow requires JavaScript.

Caleidoscopio dos contos, 10

A biografía da ilustradora Jessie Willcox Smith (1863-1935) está unida á fascinante historia de amizade e arte de tres mulleres, ela mesma e as súas compañeiras de estudos Elizabeth Shippen Green (1871-1954), cartelista e ilustradora que traballou durante moitos anos para a revista Harper, e Violet Oakley (1874-1961), a primeira muller americana en recibir a encarga dun mural para un edificio público. As tres, que foran alumnas de Howard Pyle, fixéronse cargo en 1902 dunha propiedade, The Red Rose Inn, unha casa de campo na que durante quince anos compartiron as súas vidas profesionais e domésticas. Henrietta Cozens, amiga delas, levaría a administración da casa e o coidado do xardín.

As catro mulleres en 1901

Recoñecida ilustradora americana, Jessie Willcox Smith naceu en Pensilvania, onde estudou deseño no que agora se coñece como o Moore College of Art & Design. Ampliou a súa formación na academia de Belas Artes de Pensilvania, onde se graduaría en 1888.

Dous dos seus grandes mestres foron o pintor realista Thomas Eakins e o ilustrador Howard Pyle. Xunto con Maxfield Parrish e N.C. Wyeth, participou nun influente movemento para reivindicar o traballo dos libros ilustrados nos Estados Unidos.

Willcox Smith foi unha artista prolífica e colaborou en moitas revistas da época, aínda que  tamén realizou traballos como cartelista, retratista e ilustradora de libros infantís. Moitos dos seus debuxos están inspirados nos traballos dos prerrafaelitas malia que sexan claras as referencias ao impresionismo americano e, concretamente á obra da pintora Mary Cassat (1844-1926), principalmente nos retratos de nenos e nas composicións realizadas para ás portadas da revista Good Housekeeping. Ademais, para realizar as ilustracións do libro At the Back of the North Wind, de George MacDonald, inspiraríase no modernismo.

Ilustrou case setenta libros, corenta deles infantís. Entre os seus traballos cabería destacar Heidi de Johanna Spyri e The Little Mother Goose. Pero, sen lugar a dúbidas, Os nenos da auga, de Charles Kingsley, na edición de 1916, sería a súa obra mestra.

PrincessGoblin_title_page

Son tamén seus os debuxos para o libro A Child´s Book of Stories, recompilados e adaptados por Penrhyn W. Coussens para a editorial Duffield & Company en 1911. Un libro con máis de cincocentas páxinas no que se recollen oitenta e seis contos populares de Inglaterra, Noruega e  a India, ademais dos mellores contos de fadas de Grimm, Andersen e Perrault. Os sesenta e catro poemas de Robert Louis Stevenson publicados co título de Xardín de Versos para nenos levan a súa sinatura.

Cómpre salientar o seu abundante traballo na revista Good Housekeeping, para a que Jessie Willcox Smith realizou, mes a mes, a portada durante máis de quince anos, desde decembro de 1917 ata marzo de 1933.

Legou a súa obra á Biblioteca do Congreso.