Publícase “Corpo-circuítos”, de Abraham Rubín

Anunciamos a publicación de Corpo-circuítos – Máquinas de subxectivación, de Abraham Rubín, que xa está distribuído nas librerías e tamén se pode conseguir a través desta mesma páxina web: euseino.org. Un título novo da colección Casabranca no que se analiza a subxectivación como alicerce dun réxime de traballo ­inmaterial e emocional, dunha economía que se constitúe como legalidade única das disposicións e equipamentos colectivos e coa que se acaba por dar forma ao desexo como consumo e ao futuro como débeda. Fronte a ese suxeito endebedado, o autor estuda a subxectivación do común: a diferenza, o desaxuste, a posibilidade imposible do compartido.

Rubín analiza, interpreta e desentraña o mecanismo aparentemente inevitable no que se orixina ese efecto de dominación. Corpos que, como máquinas de subxectivación, imprimen a súa pegada encol da superficie de inscrición chamada capitalismo. A subxectividade como produción.

Cunha gran capacidade para desvelar as consecuencias do mecanismo da subxectivación, o filósofo desenvolve unha argumentación que vai da produción de subxectividade como semiótica á produción de subxectividade como biopolítica pasando pola produción de subxectividade como traballo. Detense nun capítulo no que logra sintetizar e expoñer de forma directa e impresionante os efectos do don e da débeda, da perda e do don imposíbel, da débeda e a culpa. O libro remata cunha achega sobre a subxectivación común, o outro, a cuestión da singularidade e a subxectivación utópica.

Consiga o seu exemplar:

Na internet
(gastos de envío gratuítos para quen estea subscrito ou se subscriba á Carta de Información)

Nas librerías

 

Cuberta Corpo-circuitos

 

 

Publícase “Capitalismo e fascismo”, de Rebeca Baceiredo

Nos próximos días, ha chegar ás librerías Capitalismo e fascismo – Psico-ontoloxía da escravitude, o novo libro de Rebeca Baceiredo. Desta volta, a autora da Revolución non vai ser televisada leva a cabo unha análise do capitalismo como sistema que perfecciona as técnicas de poder a través dun dos seus instrumentos principais: a produción de subxectividade. O obxectivo do capitalismo, segundo Baceiredo, é moldear a subxectivación dos corpos produtivos e facelo cunha aparencia de liberdade, semellando respectar o desenvolvemento da diferenza individual.

Trátase, polo tanto, dun  libro no que se combina a potencia de intervención da filosofía coa súa capacidade de achegar, a través da teoría, unha interpretación da realidade. Como indica o subtítulo, a autora propón unha Psico-ontoloxía da escravitude para amosar o vencello nidio que une a orixe da subxectivación e a canalización sistematizada da enerxía dos corpos co fin de organizar a produción sen elementos de resistencia.

Cun estilo baseado no rigor sintético, os datos históricos e a penetración argumentativa, Rebeca Baceiredo volve achegarse ao mundo actual para reafirmar o que todo texto filosófico é: unha subversión do senso realizada coa finalidade de recuperar a vida.

Consiga o seu exemplar:

Na internet
(gastos de envío gratuítos para quen estea subscrito ou se subscriba á Carta de Información)

Nas librerías

 

Cuberta+lombo